انا قضيت في السجن 6 اعياد كل عيد منهم ليه حالة مختلفة عن التاني لكن كلهم متجمعين في فكرة واحدة ” نفسي اقضي عيد في البيت زي كل اللي في سني واعيش كل المناسبات الحلوة والحزينة مع اهلى واصحابي اللي مشتاقلهم في كل يوم وكل لحظة بتعدي عليا ورا الحديد
كنت بجهز طقم للعيد زي مكنت بعمل وانا صغير بس بالبدلة الميري الزرقا واسهر طول الليل حاضن هدومي ومستني زي اي حد ان اسمي يطلع في العفو واروح بس قدام الناس مش عايز اخرج بعفو علشان اتظلمت كتير وضميري ميسمحليش اوافق اخرج بالطريقة دي بس ببقى مستني زي العيل الصغير اي حد يقولي يللا روح بيتك مشوفكش هنا تاني
ولما ايأس خالص افضل سهران للصبح مستني صلاة العيد كلنا بالهدوم النظيفة الميري قاعدين جنب بعض الله اكبر الله اكبر ولله الحمد ونعيد على بعض ونعمل اننا مبسوطين بس الحقيقة احنا مبسوطين بس علشان بنونس بعض في المكان ده وعندنا نفس الامنيات يارب اخرج من هنا واحضن كل اللي بحبهم
دايما في الاعياد بيقفلوا علينا الباب وفيه سجون بتخلينا نخرج ساعة نعيد فيها على بعض وفي نهاية اليوم كل واحد بيكون مشغول بذكرياته في الاعياد اللي عاشها برة السجن