اترحلت لسجن وادي النطرون ودخلت زنزانة ايراد كل اللي فيها مساجين سياسية ماعدا مسجون واحد كان متهم في قضية سياسية لكن ميعرفش حاجة عن السياسية وكان مقبوض عليه قبل كدة في قضايا جنائية وحاسس دائما بغربة وسط السياسيين علشان مختلف عنهم كنا اصحاب جدا الفترة دي وقضينا ١١ يوم في الايراد كان بيطلب مني يقرأ روايات وكان بيحب يتعلم اكتر ويتغير وبعدين انتقلنا مع بعض لزنزانة تسكين مع السياسي وكان بيعاني اول فترة من الاختلاف وبيحاول يقرب وبقي يصلي ويقرب اكتر من افكار الناس اللي معانا وكان دائما يحكيلي انه خايف ميخرجش من السجن وبالنسباله القضايا الجنائي اهون بكتير من السياسة ويقرب كتير من العبادة ويصلي كل الفروض اليومية لكن محدش كان فاهمه مهما حاول كان فيه مسافة بعيدة بيخلقوها السياسيين لانه جنائي لكن كانوا الشباب الصغيرين اللي في سني قريبين منه جدا وبنحبه اوي ولما خلصت مدة حبسي عملولي حفلة وودعني هو وزملائي ومن يومها معرفتش حاجة عنه بسبب ظروفي بعد السجن وامبارح قابلت صديق كان معانا وقالي ان عمرو الجزيري توفى بأزمة قلبية بعد خروجة من السجن والفترة اللي بعد السجن اتغير عن كل تفكير سلبي لكن توفى وعرفت ده بعد سنة من وفاته عرفت امبارح ومش قادر استوعب وحزين لانه كان انسان جميل وبيحاول يكون اجمل ويقرب من الناس
رسمته في الزنزانة قبل ما اخرج في نفس اليوم اللي قالي فيه انه مش حاسس انه هيخرج من السجن أبدًا
رسمته في الزنزانة قبل ما اخرج في نفس اليوم اللي قالي فيه انه مش حاسس انه هيخرج من السجن أبدًا